Шернур район Кукнур школышто марий йылмым да литературым келгын тунемыт. Тӱрлӧ конкурсышто мастарлыкыштым ончыктат, олимпиадыште уш-акылыштым тергат. Ты школын ик эн чолга тунемшыже – Татьяна Ямбулатова. Марий ӱдыр дене республикысе олимпиадыште палыме лийынна. Тудо марий йылме дене шинчымашыжым кокымшо ий почела терген да сеҥышыш лектын. Регион-влак кокласе олимпиадыштат ончылно лийын.
– Марла чаткан кутыраш ешыште тунемынам. Кы-зыт школышто Людмила Ильинична Алмаметова шочмо йылмылан шӱмаҥда. Ме марла мурена, почеламутым возена. Пошкудо яллаште шочшо Марий АССР-ын калык артистше Илья Россыгин, Пеледыш пайремлан тӱҥалтышым пыштыше Александр Конаков дене кугешнена да нунын гай уста лияш шонена, – ойла Татьяна.
Марий ӱдыр шымлыме пашамат возаш кумылан. Этнограф, фольклорист, серызе К.А.Четкарёв нерген пашаже поснак оҥай. «Ксенофонт Архипович марий фольклорым огеш пого ыле гын, «Ший пӱян Ший Пампалче» йомакым огына пале ыле», – каласыш Таня. Ӱдыр шымлыме пашаж-влак дене «Яналов лудмаш», «Конаков лудмаш» республикысе конкурслашке ушнен да ятыр гана сеҥышыш лектын.
Таня тылеч посна «Юнармия» военно-патриотический мер толкынышто чолгалыкшым ончыкта. «Смотр строя и песни» республикысе конкурсышто команде дене сеҥышыш лектыныт. ™дыр тушто «Эн сай капитан» лӱмым сулен. Марий Эл Республикысе Юнармийын региональный съездыштыже тудым III степенян «Юнармейская доблесть» знак дене палемденыт. Тыгодым Таня тунеммылан кугу тӱткышым ойыра. Дневникыштыже – чыла «визытан».
