Сылнымутын ямжым да мутын вийжым шижын моштышо усталык шӱлышан ӱдыр-рвезе-влак 20 февральыште Морко посёлкысо М.Н.Янтемир лӱмеш тоштерышке погыненыт. Нуным ий еда эртаралтше «Казаков лудмаш» конкурс ушен. Районысо тӱрлӧ школышто тунемше-шамыч почеламутым, прозым моторын каласкаленыт, шке гыч возымо произведенийыштым калык ончыко аклаш луктыныт. Кажныже шке семынже ойыртемалтын.
Калык поэт Миклай Казаковын сылнымут саскаже моткоч поян. Ятыр почеламутшым, ойлымашыжым да йомакшым вес йылмылашкат кусареныт. Россий калык-влакын икоян улмо идалыклан пӧлеклалтше пайремыште произведений-влак марла, рушла, татарла йоҥгеныт.
– «Казаков лудмаш» конкурсым эртараш тӱҥалмылан 30 ий эртен. Ӱдыр-рвезе-влак кажне гана таҥасымашке кумылын ушнат. Ты гана Морко посёлкысо М.Н.Янтемир лӱмеш тоштерыште 41 ӱдыр-рвезе шке мастарлыкшым ончыктен. Йоча-влак ийготыштлан келшыше произведенийым ойыреныт. Ойлымаш гыч ужашым огыл, пӱтынек тунем толыныт. Кузе чыла шарнен кодыныт? Ӧрат. Адакшым поэтын шонымашыжым артист койышышт почын пуаш полшен. Моткоч тыршыше, уста улыт. Коеш, туныктышо-влак йочам конкурслан сайын ямдыленыт, – палемден М.Казаков лӱмеш сылнымут-краеведений тоштер вуйлатыше, жюри председатель Галина Сошина.
«Йылме – айдемын шӱм кумыл да вийже», – тыге серен шке жапыштыже Миклай Казаков. Ты ой дене «Шке гыч возымо произведений» таҥасыш ушнышо-влак тӱрыснек келшеныт. Нуно, муткылдышым да рифмым чын кучылтын, почеламут корныла гоч чоныштым почын пуэныт. 2-шо номеран Морко школышто тунемше Регина Григорьева шке районым йӧратымыжым «Морко кундем» почеламут гоч ончыктен. Ӱдырым сераш аваже Елена Валериановна да кугыжаныш марий йылмым туныктышо Маргарита Владимировна Михайлова кумылаҥденыт. А Регина нуным 1-ше вер дене куандарен.
Прозым лудмо дене 7-11 ияш влак коклаште Анна Огурцова (Нурӱмбал), 12-16 ияш-шамыч коклаште Дарья Зорина (Эҥерсола) ойыртемалтыныт. Почеламутым лудмо дене йочасадыш коштшо-влак коклаште Анита Иванова (Коркатово), 7-11 ияш влак коклаште Варвара Григорьева (Унчо), 12-16 ияш-шамыч коклаште Мария Николаева (Эҥерсола) икымше верым сеҥен налыныт.
Сеҥыше-влакым снимкыште ужыда.
Оля МАЙКОВА.
Авторын фотожо.
