Купол йымаке пурен возын, шўдыр-влакым ончымо годым сандалыкыш логалмыла чучеш. А те тидын нерген паледа? Шўдыржӧ могай гына уке?! Шотлен от пытаре! Тыгай сўретым Йошкар-Оласе куснылшо планетарийыште ужаш лиеш. Тудым Р.С.Соболев вуйлата.
– Куснылшо планетарий 2011 ийыште икымше ончышо-влакым вашлийын, – ойла Роман Станиславович.
– Ме районласе школ-влак дене утларак пашам ыштена. Йочасадлашке лектына. Ийготым шотыш налын, тўрлӧ программым ямдылена. Теве Йоча-влакым аралыме тўнямбал кечынат планетарийыште шуко уна лийын.
Куснылшо планетарий, у технологийым кучылтын, мландын могай лиймыжым, кызыт могай улмыжым сандалыкыш чоҥештыде ончаш йӧным ышта. Пуэн овартыме куполыш пурен, йоча-влак шўдыр-влакын кузе шочмышт, кече петырналтмаш, метеорит, комете да шуко моло нерген пален налыт.
– Ондакысе семын кажне йоча космонавт лияш ок шоно. Но планетарийыште ончымышт деч вара ятыр йодышым пуэдат. Сандалык нерген пален налаш кумылан улмышт шижалтеш. Тугеже, ме арам огыл пашам ыштена. Ала ончыкылык астроном ден шымлыше-влакым куштена? – ойла вуйлатыше.
Е.ИВАНОВА.
