Шочмо Илишевский районыштем ятыр уста шӱлышан еҥ ила. Шукерте огыл мый Верхнеяркеево селаште илыше Аниса Галимовна Саттарова дек унала миенам (снимкыште). Тудын мастар кидше тыглай арверым мотор, башкир илыш-йӱлам почын пуышо курчакыш савыра.
Аниса апан (кокан) усталык корныжо школ кружок гыч тӱҥалын. Тушто тудо икымше курчакым ыштен. Кызыт Аниса Галимовна сулен налме канышыште, сандене йӧратыме кидпашалан уло яра жапшым ойыра.
– Ковамым шарналтен, шочмо калыкемын тӱвыраж нерген шонкалаш тӱҥалынам. Башкир тӱвыра вет тыгай поян! Мый шкеже Аскинский район гыч улам гынат, Верхнеяркеевыште ятыр ий илем. Илишевский районым пагален, Илиш-бабай (коча) ден Илиш-кызы (ӱдыр) курчак — влакым ыштенам. Ӱдырлан районын флагше да гербше сынан шӧртнялге-пелганде тӱсан тувырым чиктенам, – ойла Аниса Галимовна.
Кидмастарын эн палыме курчак коллекцийже «Урал Батыр» башкир эпослан пӧлеклалтын. Акрет годсо герой-влак ятыр ончерыште лийыныт. Курчак-шамыч ик гана веле огыл кӱкшын аклалтыныт.
Азалия ФАЗДАЛОВА.
Фотом еш архив гыч налме.
