Кугу курык, шинчам йымыктарыше кече, писе мардеж, лӱдыкшылык… Йошкар-Оласе «Альпика» клубыш коштшо-влакын скалодромыш кӱзымышт годым шинча ончылнышт тыгай сӱрет сӱретлалтеш. Клуб вуйлатыше В.В.Савельев альпинизм деч посна ик кечымат огеш эртаре. Тиде тудын илышыже.
– Республикыште Альпинизм федераций 40 ий ончыч почылтын. 1990-ше ийлаште тудым «Альпика» клуб алмаштен. Мый клубыш 2000 ийыште кошташ тӱҥалынам, 2006 ий гыч тудым вуйлатем. Кызыт скалолазанийлан йоча да кугыеҥ-влакым шӱмаҥдем, – ойла Вадим Вениаминович.
Шуко еҥ скалолазанийым спортын видшылан огеш шотло. Чынак мо? В.Савельев тыге вашештыш: «Скалолазаний – спортын ик эн оҥай видше. Кызыт Токио олаште эртаралтше кеҥежымсе Олимпиадыште скалолазаний дене икымше гана таҥасымаш лийын».
Альпинизм дене кажне гаяк таза еҥ кылым кучен кертеш. Ныл ияш гычак скалолазаний клубыш кошташ лиеш. Южгунам кум ияш икшыве-влакат пырдыжыш чулымын да лӱдде кӱзат.
– Тидлан спортсмен лияш огеш кӱл. Кумыл гына лийже. Спортын тиде видшын пайдаже моткоч кугу. Тудо чогашылым вияҥда. Капкыл лывыргырак лиеш. ™шанлын тарванылаш, писын шонаш тунемат. Сӱретым куштылгын шарнен кодат. Уш-акыл пӱсемеш, шкалан акым пуэн кертат. Нелылыкым куштылгын сеҥаш тӱҥалат, – каласкала Вадим Вениаминович.
Скалолазаний дене кылым кучаш шонет гын, кугу курыкым кычалман огыл. Тидлан лӱмын келыштарыме пырдыж, скалодром улыт.
Эн самырык альпинистлан американец Джордан Ромером шотлат. Тудо 13 ияш улмыж годым 2010 ийыште Эверест курыкыш кӱзен.
