Специальный сарзе операцийлан полышым пуымаште республикнан надырже кугу. Йоча-влакат кертмышт семын ты пашашке ушнат: маскироватлалтме сеткым пидыт, талешке-шамычым поро шомакан серыш дене куандарат. Марий Элыште эртаралтше оборонно-массовый да военно-патриотический паша месячник лач тидлан пӧлеклалтеш. Тудым 23 январьыште Йошкар-Оласе Самырыквлакын полатыштышт торжественно почыныт.
Тӱрлӧрайон гыч пайремыш ушнышо-влакым ончыч экскурсий дене коштыктеныт. Мутлан, Морко район гыч толшо ӱдыр-рвезе-шамычым Юл кундем кугыжаныш технологий университетын Сарзе тунемме рӱдерыштыже вашлийыныт. Коркатово лицейын 10-шо кадет классыштыже тунемше Ксения Иванова (снимкыште шолаште) ты тӧнежыш тунемаш пураш кумылаҥын. У Торъял районын икшывыже-влаклан ДОСААФ-ын пашажым радамлен ончыктеныт. СВО-што лийше-шамыч дене вашмутланаш йӧным пуэныт. Тидын нерген У Торъял школышто 10-шо классыште шинчымашым погышо Алина Ахмадулина (снимкыште пурлаште) каласкален
Йошкар-Оласе Самырык-влакын полатыштышт Марий Элысе правоохранительный орган-шамычын пашаеҥышт ончерым келыштареныт, тӱрлӧмастер-классым эртареныт. ЙошкарОласе 4-ше номеран гимназийын юнармеецше-влаклан нунын чийыме вургем ойыртемым шымлаш, дроным виктарен ончаш келшен. Снимкыште покшелне юнармий отрядын командирже Булат Павловым да тудын алмаштышыже Данил Егоровым ужыда.
Элнан волгыдо ончыкылыкшо – самырык тукымын пеҥ- гыде, ӱшанле, поро кидыштыже. Йоча-влак шочмо кундемыштым пагален, йӧратен кушкыт. Патриот шӱлышан мероприятийлаш кумылын ушнат. Теве Советский посёлкысо 3-шо номеран школышто 10-шо классыште тунемше Екатерина Князева (снимкыште) чолга юнармеец улеш. II степенян «Юнармейская доблесть» знак дене палемдалтын. Тыгайже республикыштына але вич йочан гына.
– Тыршымем тыге кӱкшын аклымылан моткоч йывыртенам. Ты сеҥымаш ончыкыжымат патыр, лӱддымӧ, элын ӱшанле аралтышыже лияш тарата, – ойла Катя.
Ӱдыр спорт дене кылым куча, пуля дене лӱйкалымаште эре ончылно.
Оля МАЙКОВА.
Авторын фотожо.
