Марий Элыште Йошкар книгам 2023 ийыште уэмден савыктыме. Тушко республикыштына шуэн вашлиялтше кушкыл, янлык ден поҥго-влакым пуртымо. Ты книгам ямдылаш келге пашам ыштыман. Ончыкылыклан кӱлешан уверым погымаште самырык тукым кугу полышым пуэн кертеш. Морко район Коркатово лицейыште 11-ше классыште тунемше Алина Павлова (снимкыште) шочмо кундемжын кушкыл поянлыкшым нигӧ деч сайын пала. Ӱдыр Марий Эл Республикысе Йоча экологий да биологий рӱдерыште эртаралтше «Человек. Природа. Творчество» конкурсышто «Ботаника и экология растений» таҥасыште сеҥышыш лектын.
— Шымлыме пашам биологийым туныктышо Валентина Михайловна Васильева ден «Кугу Какшан» заповедникын кугурак шанче пашаеҥже Геннадий Алексеевич Богданов возаш полшеныт. Тудо Морко районышто шуэн вашлиялтше да Йошкар книгаш пуртымо кушкыл-влаклан пӧлеклалтын. Чылаже 62 кушкылым эскерыме. Коркатовышто да лишыл кундемлаште шуэн вашлиялтше кушкыллан поян ныл верым муынна. Кокытшо кугыжаныш пӱртӱс памятниклан шотлалтеш: Карман Курык ден Йошкар сер. Тыгак оҥай иктешлымашым ыштыме: Йошкар книгаш пуртымо постенный костенец ден вондер семын кушшо арамам лач Морко районышто веле вашлияш лиеш, — ойла Алина.
Чаманен каласыман, шуко кушкылын лӱмжӧ тыглай еҥлан палыдыме. Сандене нуным чӱчкыдын огытат шеклане да тошкен каят. Аралыме верлаштат айдемын уда койышыжо палдырна.
— Йошкар серыш канаш коштшо-влаклан кӧра ятыр кушкылын чотшо шагалемын. Экологий йолгорно воктене ӱдырката, слабительный йытын ден длиннорогий кокушник чылт йомы- ныт. Тиде йолгорным йоҥылыш ыштыме дене кылдалтын, — палдара ӱдыр.
Пӱртӱс поянлыкым арален кодаш манын, Коркатово лицей пелен экоотряд пашам ышта. Алина ынде кокымшо ий отрядыште улеш. Самырык эколог-влак кушкыл-шамычын чотыштым эскерат, шӱкшакым погат да экологий йолгорным ыштат. Ботанический садын пашаеҥышт дене пырля ӱдыр-рвезе-влак трехлопастный лазурникын, калганын да пунан вӱршудын чотыштым кугемденыт. Ты пашам лицеист-влак умбакыжат шуяш да эшеат вораҥдараш шонат.
Катя СЕРГЕЕВА.
Фотом еш архив гыч налме.
