Марий калык ожнысек кушташ йӧрата. Куштымаш гоч шке шонымашыжым почын пуэн, куан ден ойгыжым пайла. Бирск оласе рӱдӧ тӱвыра пӧрт пелен «Энсай» куштышо ансамбль (снимкыште) уло. Марий йӱлам, фольклорым арален кодаш шонымаш дене 2007 ийыште ты йоча ансамбльым А.А.ШУМАТОВА чумырен.
– Алина Алексеевна, паша радамда дене палдарыза.
– «Энсай» ансамбльыш кошто йоча-влак Бирск оласе школлаште шинчымашым налыт. Нуно урок деч вара кушташ тунемыт. Марий йӱла нерген пален налаш вашкат. «Мыланна тыште эн сай», – ойлат нуно. Ийгот дене лу ияш да тылеч кугурак-влак улыт. Коллективыште – 12-15 йоча. Калык-влакын тывырдыкышт – тиде посна историй. Сандене кажне движенийым тунемына. Ме марий калык фольклорлан жапым утларак ойырена гынат, репертуарышкына руш, башкир, татар, украин калык-влакын куштымашыштымат пуртенна. Йоча-влак «Кандырам пунен», «Курыкмарла», «Тошто марла» кушташ утларак йӧратат.
– Те тыгак сценке-влакым шындеда. Оласе марий йоча-шамычым кузе кумылаҥдеда?
– Районыштына кандаш марий ял уло. Ансамбльыш коштшо йоча-влак чылан марла умылат, южышт кутырат. Марий пайрем йўла-влак нерген пален налаш нунылан моткоч оҥай. Кажне гана келгынрак каласкалаш йодыт. Коча-ковашт деч йодыштыт. «Живая нить традиций» конкурслан «Шорыкйол пайрем кас» спектакль-реконструкцийым икымше гана 2016 ийыште шындыме. Калык мемнам шокшо кидсовыш дене вашлийын. Тиде пашам угыч вораҥдарен колташ шонымаш уло. Кертме семын йӱла да пайрем дене кылдалтше сценке-влакым шындаш тӱҥалына.
Е.ИВАНОВА мутланен.
