Павел ТИТОВ, ончычсо юнкор:
– Лудын мошташ тӱҥалмекемак, «Ямде лийым» шергалаш тӱҥалынам. Кугурак лиймекем, мастарлыкемым тергенам. Вет мый Сергей Григорьевич Чавайнын шочмо ялешыже шочынам. Ачамат йоча газетыш возкален, юнкор слётышто лийын. Мыйымат 2005 ийыште Волжский район Пӧтъял школышто эртаралтше слётышко ӱжыныт. Тушто Володя Матвеев, Игорь Попов да моло дене палыме лийынам.
Кызыт Марий Эл деч тораште илем гынат, чонемже – шочмо кундемыштак. Усталык шӱлышем йомын огыл. Тугак возкалем, но шкаланем. Редакций пашаеҥ-влаклан ончыкыжымат оҥай газетым лукташ мастарлыкым, возкалышылан пӱсӧ перам, лудшылан поро кумылым тыланем.
