Морко район Коркатово лицейын тунемшыже Таня Суворова почеламутым сылнын лудаш йӧрата. Сценыште шкенжым устан куча: шке вийжылан ӱшанымыже иканаште шижалтеш. Чолга марий ӱдыр «Колумб лудмаш» регион-влак кокласе сылнымут пайремыш тений кумшо гана ушнен. В.Колумбын «Пожар» кусарыме почеламутшым лудмыжо кажне еҥын чонешыже логалын, очыни. Ӱдыръеҥ, образыш пурен, авторын шонымашыжым кажне колыштшо деке намиен шуктен. Таня ты почеламут дене 11-14 ияш-влак коклаште икымше верыш лектын.
– Марий койышан улмемлан аваем ден туныктышемлан тауштем. Шочмо йылмым йӧраташ ешыште тунемынам гын, келгынрак шижаш туныктышем Нина Вениаминовна Аркадьева полша. Марий поэт-влак Валентин Колумбын, Сергей Чавайнын, Миклай Казаковын сылнымутышт утларак келшат. Нунын произведенийыштым лудын, мут шапашем пойдарем, шинчымашем ешарем. Садланак 7-8 куплетан почеламутым мый пеш писын тунемам, – ойла Таня.
