Кужэҥер район Руш Шой школышто «Книгам йӧратыше-влакын клубышт» кружок 30 утла ий пашам ышта. Тудым школысо библиотекарь Л.В.Светлакова вуйлата.
– Элыштына книгам лудмо йодыш пӱсылан шотлалтеш. Мемнам, школ да книгагудо пашаеҥ-влакым, тиде поснак тургыжландара. Библиотеке пашаеҥ, тӱрлӧ йӧным кучылтын, икшывым изи годсек лудаш кумылаҥдышаш. Йоча мо нерген да кузе лудеш? Тидын деч элнан ончыкылыкшо шога. Тыгай шонымаш дене кружокым почынна, – ойла Людмила Васильевна.
Кружокышко 3-шо классыште тунемше 15 ӱдыр-рвезе (снимкыште) коштеш. Л.В.Светлакова серызе-влак, нунын илыш корнышт, усталыкышт дене палдара. Книгам пырля лудыт, произведений почеш сӱретлат, герой-влакын койыш-шоктышышт нерген каҥашат. Йоча книга арняште кумдан палыме серызе-влакын лӱмгечыштлан пӧлеклалтше изирак сценкым ончыктат.
Йоча-шамыч конкурслашке кумылын ушнат: викториныште уш-акылыштым тергат, почеламутым сылнын лудмаште мастарлыкыштым ончыктат. Науко да технологий идалыклан пӧлеклалтше «Удивительный мир открытий» мероприятийыште кумдан палыме шанчызе, путешественник-влак, техникын историйже дене палыме лийыныт.
– Кружокын паша лектышыже – йочан кумда тӱняумылымашыже, ум пален налаш кумылан, лудаш шӱман улмыжо, – ойла Людмила Васильевна.
