29 июль гыч 2 август марте Школьник-влакын российысе толкынышт Татарстан Республикыште «Экологийын лидерже-влак» сменым эртарен. Тушто Йошкар-Оласе 17-ше номеран школын 10-шо классшым тунем пытарыше Денис ВИНОКУРОВ (снимкыште) лийын.
Рвезе Йошкар-Оласе Экологий да биологий йоча рӱдерышке 5-ше класс гыч коштеш. Эн ончыч экологий да йырвел нерген тӱҥ шинчымашым налын. Кызыт кугурак проблеме-влакым лончыла. Шымлымаш пашаж дене шанче конференцийлашке ушна.
– Мый ончыч кушкыл-влакын экологийыштым шымленам. Айдеме ден шукш-копшаҥге-шамыч кокласе кыл оҥайла чучын. Садлан кызыт мӱкш-влак нерген комиксым сӱретленам, – ойла Денис. – Машина мӱкш-влаклан изи огыл эҥгекым ышта. Тидым комиксыште ончыктенам. Йомак йӧным кучылтынам. Ава ден икшыве ачам шыркам погаш колтат. Тудо машина гыч лекше уда газ дене аярга. Ме илышыште тидын нерген огына шоналте. Аяргыше южлан кӧра мӱкш-влак вес вере чоҥештен каят. Пакчасе кушкылна-влакым огыт шыркаҥде. Чылажат икте-весе дене чак кылдалтын.
Рвезылан пӱртӱсым шымлаш изинек келша. Ончыкыжым шочмо мландым айдемын эҥгекым кондымыж деч аралаш шона.
