19-21 майыште Башкортостан Республикысе Шаран да Дєртыльє районлаште илыше марий-влак дене «Ямде лий», «Кугарня» газетлан пашаеҥышт да марий эстрадын шӱдыржӧ-шамыч Роза Искакова, Вадим Краснов, Сергей Пакеев лийынна.
Икымше кечын Октябрьский олаште илыше марий-влакым концерт-вашлиймаш дене куандаренна.
Эрлашыжым Шаран районысо школлаште туныктышо, тунемше, ача-ава-влак дене вашлийын мутланенна. Газет паша, редакций илыш, ончыкылык шонымаш дене палдаренна. Мурызо-влак мурсемыштым пӧлекленыт.
Акпарс кыдалаш школ ятыр ӱдыр-рвезым кумда илыш корныш луктын. Нунын кокла гыч иктыже – Марий Эл Республикын гимнжын авторжо Давлет Исламов. Кызыт школышто 71 йоча тунемеш. 9 выпускник школ дене чеверласаш ямдылалтеш.
– Йылме – айдемын эн кугу поянлыкше. Тидым чылан раш умылена. Сандене кажне йоча марий йылмым тунемеш. Марий йылмым туныктышо Валентина Алексеевна Гибадуллина йӱлам, тӱвырам палдарен да арален кодымаште чот тырша. Школышто «Кечыйол» марий фольклор кружок пашам ышта. Усола клуб пелен «Ош пеледыш» калык ансамбль уло, – палдара школ вуйлатыше Г.Ф.Габдрахманова.
Янахмат тӱҥ школышто 79 ӱдыр-рвезылан 12 туныктышо келге шинчымашым пуа. Кажне йоча марий йылмым шочмо йылме семын тунемеш. Тидын шотышто туныктышо-влак М.А.Сыртланова ден Н.А.Минликаеван надырышт моткоч кугу.
– 4-ше классыште 14 йоча тунемеш. Чыланат «Пеледыш аршаш» ансамбльыш коштыт. Нунын дене «Ший кандыра» республикысе пайремыш ий еда ушнена. Пошкудо районлаште мастарлыкнам ончыктена. Света Атагуллина тӱрлӧ конкурсышко ушна да сеҥымашлаж дене куандара, – ойла М.А.Сыртланова (снимкыште 4-ше класс дене пырля).
Мещер тӱҥ школышто вич ял гыч 50 ӱдыр-рвезе тунемеш. 10 туныктышо пашам ышта. Йоча-влак башкир да марий йылмылам шочмо йылме семын тунемыт. Но кумылан-шамыч шагалемыт. Школ вуйлатыше Юлия Петровна Галинан ойжо почеш, Алина Тансарина ден Богдан Емельянов школын чапшым кажне гаяк конкурсышто аралат.
Мӱндыр родына-влак тӱрлӧ калык коклаште илат гынат, шочмо марий йылмыштым, тӱвыраштым аралат, йӱлаштым пален шогат, марий улмышт дене моткоч кугешнат. Самырык тукымлан сай примерым ончыктат.
