20 сентябрьыште «Нацийын кроссшо-2025» всероссийский таҥасымаш Российын 84 регионыштыжо эртаралтын. Тушко миллион утла спортсмен ушнен. Марий Элын рӱдолаштыже шке писылыкшым 5 тӱжем утла еҥ терген. Ийготым шотыш налын, 2, 4, 6, 8 километрым куржыныт.
Теве Йошкар-Ола гыч Александра Гусева (снимкыште) ты акцийыш икымше гана ушнен. Спортсменке 4 километрым куржын да шке ийготан-влак коклаште кокымшо верым сеҥен налын.
– Мый шке виемлан ӱшаненам. Тренерем Юлия Александровна Волковалан тауштем. Тений мыйым ончылтеныт гын, вес ийын икымшак лийнем, – ойла Александра.
Ӱдыр Йошкар-Оласе 2-шо номеран школышто 6-шо «В» классыште тунемеш. 2022 ий гыч
куштылго атлетике дене кылым куча, йӱштылаш, кушташ кумылан. «Сашка бегает» телеграмканалым вӱда.
Оля МАЙКОВА.
Фотом еш архив гыч налме.
