Кристина Шапкина – Кужэҥер район Агытансола ялын шочшыжо. Тений Йӱледӱр кыдалаш школым тунем пытарен. 11 ий жапыште Кристина школын, районын чапшым ятыр конкурсышто арален. Шуко мероприятийыште шкенжым чолган ончыктен. Йӧратыме предметше-влак кокла гыч иктыже – марий йылме. Ты предмет дене республикысе олимпиадыште кум ий почела уш-акылжым терген. Ик гана кумшо верыш лектын гын, кок гана икымше верым сеҥен налын. Тиде туныктышо дене пырля тыршен пашам ыштымыштын тӱвыргӧ лектышыже.
Тӱҥалтыш класслаште тунеммыж годымак Кристина сылнымутлан шӱмаҥын. Лудмаш конкурслаш ушнен. Варажым школышто эртарыме кажне гаяк мероприятийым вӱдаш тӱҥалын. «Йылме лывырге лийже манын, книгам лудман. Сылнымутан произведенийлам рушлат, марлат лудаш кумылан улам. А.С.Пушкинын «Евгений Онегин» романже мыланем поснак лишыл. Тудым тӱҥалтыш гыч мучаш марте ик шӱлыш дене лудынам», – ойла ӱдыр. Кристинан ешыштыже икте-весе дене чылан марла мутланат. Садлан марий шӱлыш тудын чонышкыжо изиж годымак шыҥен. Марий йӱла ден тӱвыра деке лишыл. Кодшо ийын марий шӱлышан улмыжым «Марий ӱдыр – сылне ӱдыр» районысо конкурсышто ончыктен. Марий тувырым чиен, весела сем почеш лывыргын кушталтымыж дене калыкым куандарен. Марий улмыж дене кугешна.
«Марий йылмынам, йӱла ден тӱвыранам арален кодыман. Ме огыл гын, кӧ тидым ышташ тӱҥалеш? Мыйын шонымаште, ме, кушкын толшо тукым, тидлан негызым пыштышаш улына» – ойла Кристина.
