Марий эрге – Россий Герой

 Лӱддымӧ, чолга, виян, патыр, еҥлан кеч-кунам полышым пуаш да Шочмо элым аралаш ямде улшо койыш-шоктышан лийшаш Россий Герой. Марий Турек посёлкышто илыше Лариса Васильевна ден Валерий Алексеевич Иштугановмыт лач тыгаяк эргым ончен куштеныт.  Россий Президент В.В.Путин Юж десант войскан 31-ше отдельный гвардий десант-штурмовой бригаде командирын алмаштышыже подполковник Сергей Иштугановлан Россий Геройын «Шӧртньӧ Шӱдыр» медальжым шукерте огыл кучыктен. Геройын йоча пагытше, школ илышыж нерген ача-аваж дене вашлийын кутыренна.

– Сергей военный лияш изинек шонен. Автомат, раций дене эре модын.  Иктаж вич ияшыж годым военный формым ургенам. Тудым эргым кужу жап кудашде чиен кошто. Тунамак, очыни, изи чоныштыжо виян тул ылыжын да, кушкын шумекыже, шонымашкыже шуаш полшен. Школыш кайымеке, военный книгам лудаш кумылаҥын, шуко жапым книгагудышто эртарен, тыгаяк сынан кином ончен.  Сеҥымаш Парадым гын иканат ончыде кодын огыл. Варажым армий генерал В.Ф.Маргелов лӱмеш Рязаньысе юж-десант командный училищыште тунеммыж годым Москосо Сеҥымаш Парадыште кок гана ошкылын, – ойла Лариса Васильевна.

Сергей 1-2-шо класслам Арбор школышто тунемын. 3-шо класс гыч Марий Турек школыш куснен. Изиш ӧрмалгыше, поро шинчаончалтышан рвезын кугу кӱкшытыш шуын кертмыжым туныктышо Э.Г.Казанцева иканаште шижын. Сергей шонымашыш шуаш тыршымыж дене ойыртемалтын. Кеч-могай пашам тӱҥалмеке, мучаш марте шуктен. Тыштак тудо шочмо йылмым келгынрак тунемаш тӱҥалын, марий йылме дене олимпиадыш коштын, поэзийлан шӱмаҥын.  Чаманен каласыман, рвезын чыла возымыжо аралалтын огыл.  Икмыняржым Лариса Иштуганова шӧртньӧ семын арала.

Военный профессийым налаш шонышо чытыше да пеҥгыде тазалыкан лийшаш. Тидым  Сергей изи годсек умылен да спорт дене пеҥгыде кылым кучен. Тудым ачаже Валерий Алексеевич шӱмаҥден. Тудо Марий Турек школышто физкультур урокым вӱден.  Сергей – ече да самбо дене спорт мастерын кандидатше.

Кеҥежым куржталыштынна, телым ече дене коштынна. Кудымшо классыште тунеммыж годым районысо таҥасымаште икымше верым налмыж деч вара утларак тыршаш тӱҥалын. Карате, бокс дене кылым кучен.  Ончыкыжым мыйын корнем дене кая манынат шоненам. Эргым шке ойырымо корныж деч кораҥын огыл, – ойла геройын ачаже. – «Кӧ элым аралаш тӱҥалеш» манын да военныйлан Рязаньыш тунемаш пурен. Кызытат  чон йодмо пашажым шукта, элым арала.

Изаж гай чолга, виян да лӱддымӧ Надя шӱжарже кушкеш. Тудо Марий Турек школын 9-ше классыштыже тунемеш. «Поро пашам ышташ, еҥ-влаклан полшаш келша. Изам – мыланем пример», – мутланымашке ушныш Надя.

Иштугановмытын кыдалаш ӱдырышт – Юлия – Москосо ик эмлымверыште администраторлан пашам ышта.

Лариса Васильевна ден Валерий Алексеевич Сергей эргыштын лӱдыкшӧ, неле, но тыгодым суапле пашам ойырымыжым умылат. Тудын дене кугешнат.  Марий эрге, Россий Герой Сергей Иштуганов дене кажне еҥ кугешнышаш. Да тудо самырык тукымлан пример.