Кинорежиссёр, актёр, серызе Алексей Алексеевын лӱмжӧшуко еҥлан палыме. Тудо кызыт Эстонийыште ила. Таллин университетын тӱвыра факультетшын фильм да видео пӧлкаштыже тунемын, документальный кинон режиссёржо дипломым налын. 2003 ийыште «Этномедий» кинокомпанийым ыштен. 2009-2012 ийлаште А.Алексеев Таллин университетысе инфотехнологий пӧлкаште видеоспециалистлан тыршен. Кызыт Сауэ гимназийыште аудиовизуальный да видео-урок-влакым вӱда.
– Алексей Геннадьевич, кином кунам войзаш тӱҥалында?
– Икымше кином 1998 ийыште сниматленам. Тудо «Шым ер коклаште» маналтын. Волжский районышто Шемъер лӱман ял уло. Тиде ял шым ер коклаште верланен. Тыште мыйын родо-тукымем ила.
– Икымше фотоаппаратдам шарнеда?
– Икымше фотоаппаратем «Смена» маналтын. Тудо ачамын лийын. Тиде фотоаппарат дене школышто тунеммем годым фото-влакым ыштенам. «Зенит» лӱман фотоаппаратым налаш чонем йӱлен. Но пеш шерге лийын. Кушкын шуамат, икымше пашадар дене налам, шоненам. Илыш вашталтын, тетла «Зенитым» огыт лук.
– Ятыр кинода шочмо Марий кундемлан пӧлеклалтше.
– Тачысе кечын марий калыкын йӱлаже да илыш радамжылан пӧлеклалтше 14 фильм уло. Шочмо калыкем дене йот элыште илыше-влакым палдарем. Марий калык ойпогылан, йӱлалан моткоч поян. Тидын нерген каласкалаш да войзаш кӱлеш. Эстон калык фильм-влакым порын вашлиеш.
– Кызыт С.Чавайнлан пӧлеклалтше кином ямдыледа. Тудым войзаш мо таратен?
– Сергей Чавайнын «Ото» почеламутшым изижат-кугужат палат. Тудым 45 йылмышке кусарыме. Мыят уста серызе да ото нерген каласкалаш шонен пыштенам. Ото – марий калыкын саклыме верже. Тидын нерген, мутат уке, вес элыштат палышаш улыт. Сылне марий пӱртӱсым кугешнен ончыкташ шонем.
– Йоча-влакым документальный кином войзымо радам дене палдарыза.
– Эн ондак сценарий возалтеш. Кызыт чӱчкыдын кино тӱҥалтыште квадракоптерым кучылтыт. Тыге кином ончышо вигак мотор вершӧрым ужын кертеш. Тиде йӧн дене чӱчкыдын пайдаланет гын, чоҥештымашым ончен, калык писын ноя. Садлан тудым кино тӱҥалтыште, покшелне да мучаште веле кучылтман. Интервьюм налаш кайыме деч ончыч еҥ дене эн ондак мутланен келшыман. Кином войзышо еҥ шкеже шагалрак кутырышаш, весын каласкалымыжым утларак колыштман.
