Кужэҥер район Тошто Йӱледӱр гыч Аня ден Илья АНДРЕЕВМЫТ «Ямде лий» газетышке оҥай деч оҥай заметке-шамычым колташ тӱҥальыч. Возенжат моштат! 21 курымышто йоча марий шӱлышан кушшо да коча-коважын йылмыштым ынже мондо манын, мом ыштыман? Ача-авашт Александр Витальевич ден Алина Валерьевна деч пален налаш шонен пыштышым.
Ава Тошто Йӱледӱр клубышто тӱвыра организаторлан пашам ышта. Пелашыже верысе клуб пеленак кочегарлан тыршен, тӱня мучко шучко чер шарлымылан кӧра кызыт сурт сомылкам ворандара.
Ешыште – кум икшыве. Кугуракше – Аня. Тений Шўдымарий школын нылымше классшым тунем пытарен. Илья нылымше классыш вончен. 7 ияш Руслан эргышт школыш каяш ямдылалтеш.
– Йоча-влак уремыште модын кошташ кумылан огытыл. Эре мемнан пелен улыт: шӱкым сомылат, йыраҥлаш вӱдым шават, пӧрт кєргым эрыктат, кочкаш ямдылаш полшат. Аня ден Илья ӱчашен-ӱчашен, кӧн шукырак заметкыже савыкталтеш манын, «Ямде лий» газетыш возат. Сераш шке кумылын тӱҥалыныт. Йылмыштым лывырташ марий книга-влак полшат. Йӧратыме книгашт – Людмила Попован ямдылыме «Кечыйол модмо пагыт». Тушто Шӱдымарий школышто тунемше-влакын почеламутыштым, ойлымашыштым, йомакыштым, уштодышыштым савыктыме. Кугурак йоча-влакын пашаштым ончен возаш тунемыт. Ешыште марла гына кутырена. Ялысе икшыват марла ок ойло гын, кє марий йылмым арален кода?! – ойлат ача-ава.
Аня марий мурылан шӱман. Районышто эртаралтше «Лач пырляште весела», «Йылдыр-йылдыр» конкурслаште кажне ийын мастарлыкшым ончыкта. «Рождественская звезда» сымыктыш да усталык тӱнямбал конкурсышто 3-шо вер дене палемдалтын. Сочинений конкурслаштат чӱчкыдын сеҥышыш лектеш. Илья почеламутым устан лудеш. «Мый йӧратем родной элемым», «Йӧратем мый шочмо йылмем» школысо лудмаш конкурсышто да моло вереат ончылно лийын. Руслан шольышт иза-акам ончен тунемеш.
– Йоча-влак кугезе-влакын йӱлаштым ынышт мондо манын, марий пайрем-влакым эреак пайремлена. Ӱярня годым чылан пырля мелнам кўэштына, курык гыч мунчалтена, Ӱярня кувам йӱлатена. Кугечылан эрдене эрак когыльым ыштена, муным чиялтена. Шочмо кечымат тӱшкан пайремлена. Еш, йӧратымаш да ӱшанле улмо кечым ешна дене палемдаш шонена, – ойла озавате.
Андреевмыт еш (снимкыште) гай марий шӱлышан еш-влак шукырак лийышт!
