– Кызыт икшыве-влак марла начарын кутырат, южышт йӧршын огыт мутлане. Тиде йодыш мыйым моткоч тургыжландара. Садлан йочасадыште марий йылме дене кружокым почынам. Арнялан ик гана 15-20 минуташ занятийым эртарем. Мыйын шонымаште, марий ача-аван икшывышт марла кутырышаш улыт, – ойла Пошкырт кундем Дӧртыльӧ район Миядык селасе «Теремок» йочасадын воспитательже Е.А.Сатараева.
Кружокышто йоча-влак саламлалташ да чеверласаш, шке нерген марла каласкалаш, еш, йолташ дене палдараш, сӱрет почеш изи ойлымашым чоҥаш тунемыт. Марий мурым мурат. Воспитатель-влак марий пайремым эртарат. Снимкыште марий курчак нерген урокым ужыда.
– Икшыве-влаклан тӱрлӧ чиян сӱретан марий книга-шамыч келшат. Мый нунылан йоча серызе Елена Юнусован «Турнявӧчыж, Регенче да молат», «Копшаҥге сар», «Ужаваиге ден Коракиге» книгалаже гыч йомак-влакым лудам. Тылеч посна йочасадыштына Семён Николаевын, Юрий Соловьёвын, Анжела Тимоеван книгашт-влак улыт, – каласкала Елена Афанасьевна.
Куандара, Пошкырт кундемысе йочасадыштат марий шӱлыш озалана. Тугеже марий йылмына ончыкыжымат пеледалт тӱзлана.
