Пытартыш жапыште яллаште марий ача-аван икшывыштат рушла кутыраш тӱҥалыныт. Садлан марла пелештыше йоча кызытсе илышыште южгунам шӧртньӧ падырашла чучеш. Тыгай марий шӱлышан самырык еш Параньга район Усола ялыште ила. Палыме лийза – тиде Харитоновмыт (снимкыште). Ава Татьяна Эдуардовна ялысе кевытыште пашам ышта. Пелашыже Сергей Александрович Москошко коштеш. Вате-марий кок икшывым ончен куштат.
Кок полышкалыше
Ксения – аван эн кугу полышкалышыже. Татьяна Эдуардовнан паша гыч толмешкыже, пӧрткӧргым эрыкта, кочкаш шолтен ямдыла. Кеҥежым пакчаште шӱкшудым сомыла, вӱдым шава. Чолга ӱдыр Параньга посёлкысо школын 8-ше классшым тунем пытарен. Тудым чыла гаяк мероприятий ден конкурслаште ужаш лиеш. Спорт ориентирований дене пеҥгыде кылым куча. «Лӱдыкшыдымылык школ» мер толкынын эртарыме таҥасымашке чолган ушна. «Российский Азимут» всероссийский соревнованийыште икмыняр гана ончылно лийын. Турслётышкат миен. 42 медальже ден кок кубокшо уло. Ятыр гана сеҥымашке шумыжлан Усола школ директор М.А.Богдановлан кугу таум ойла.
Тыршымыже арам лийын огыл. Тений Ксениялан «Артек» тӱнямбал йоча рӱдерышке миен толаш пиал шыргыжалын.
– Мый «Наследники Великой Победы» сменыште лийынам. Тушто пӱртӱсшӧ могай сӧрал! Шем теҥыз, Аю-Даг курык, Адалары отро чоным вӱчкеныт. Кажне кече мероприятийлан поян лийын. Таҥасымашлаште вийнам тергенна. Мый комбинированный турист маршрутышто 2-шо верым сеҥен налынам. «Артекыште» лийме жап ӱмыр мучкылан ушешем кодеш, – ойла ӱдыр.
Ксения тылеч посна «Шымавуч» йоча ансамбльыште мура. ™дыр-влак дене пырля тӱрлӧ конкурсышто мастарлыкыштым ончыктат да сеҥышыш лектыт. Кызыт гитар дене шке гыч шокташ тунемеш.
Настя шӱжарже акаж гаяк чолга лияш тырша. Тудо Усола школын 4-ше классшым тунем пытарен. Сӱретлаш кумылан. Чонжылан пӱртӱс поснак лишыл. Сӱретше дене школысо да районысо конкурслашке ушна. Спортлан шӱман. Кеҥеж каникулышто жапым пайдалын эртара. Йолташыже-влак дене футбол, баскетбол да моло вес модышла дене модыт. Акаж ден аважлан сурт сомылкам ышташ полша.
Пӱртӱс лоҥгаште канат
Суртозан Моско гыч пӧртылмыжым чылан вучат. Толмекыже, корнышко тарванат. Харитоновмытлан Кужэҥер кундемысе «Кӱ курык» пӱртӱс заказникыште, «Марий Швейцарий» каныме базыште пеш келшен. Еш дене колым кучаш йӧратат. Кажныжын эҥырвараже уло. Тыгак Йошкар-Оласе, Озаҥысе тӱрлӧ сылне верым ончен коштыт. Тӱҥжӧ – еш дене жапым пырля пайдалын эртарат.
Марий шӱлыш – вӱрыштышт
– Йоча-влак дене изинек марла кутырена. Марий Элыште илена гын, марий йылмым сайын палышаш улына манын шонена. Тора кундемышке каена гынат, урем дене ошкылмо годым марла вожылде мутланена. Марий концертлашке кошташ тыршена. Марий улмына дене моткоч кугешнена, – ойлат вате-марий.
