Татарстан Республик Агрыз районысо «Кадрек сем» калык фольклор ансамбльыш тӱрлӧ ийготан участник коштеш. Нунын кокла гыч иктыже – Карина Изибаева. Марий кумылан ӱдыр Кучук школышто 9-ше классым тунем пытарен.
– Тиде ансамбльыш йочасад гычак ушненам. Мураш, кушташ воспитателем-влак кумылаҥденыт. Чолгалыкнам концертлаште, смотр-конкурслаште, фестивальлаште ончыктена. Калыкым тӱрлӧ вел куштымаш дене куандарена. 2022 ийыште «Семык» республикысе пайрем шочмо Кадрек ялыштем эртаралтын. Вес ийжын – Пелемеш селаште. 2023 ийыште Набережные Челны олаште эртаралтше «Сайяр» конкурсышто «Шорыкйол» сценкым модын ончыктымо дене кумшо верыш лектынна. Сеҥымаш дене шуко гана ойыртемалтынна. Тыгай мероприятий-шамыч тӱвыра аланыште шуко ум пален налаш, коллектив-влак дене палыме лияш йӧным ыштат. Шке калыкын пайрем ойыртемже шотышто уш-акылым пойдарена, – ойла Карина.
Чолга ӱдыр шочмо марий йылмым, тӱвырам, сымыктышым пагала. Тидыже куандара. Карина марий йылме да литератур дене регион-влак кокласе олимпиадыште шинчымашыжым терген да кумшо верым сеҥен налын.
З.ТИМОФЕЕВА.
