Йошкар-Оласе Сеҥымашын XXX идалыкше лӱмеш тӱвыра полатыште Марий КВН фестиваль эртаралтын. Вич команде мастарлыкшым ончыктен. Советский посёлкысо 3-шо номеран школын «Ӱдыр-влак» командыже кумшо верым сеҥен налын.
– Тиде конкурс – мемнан икымше кугу ошкылна. Ме школышто марий йылмым огына тунем, утларакше рушла кутырена. Англичан йылмым туныктышо Светлана Васильевна Игнатьева мемнам марла раш ойлаш туныктен. Музык урокым вӱдышӧ Ольга Владимировна Петраева конкурслан мурым кычалаш, постановкым шындаш полшен. Физикым туныктышо Виталий Владимирович Токмалаев технике шотышто мутым кучен. Ик еш семын пашам ыштен, сеҥымашке шуынна, – ойлат тунемше-влак.
