Марий ешлаште икшыве-влаклан марий лӱмым пытартыш жапыште чӱчкыдын пуат. Мутлан, радиовӱдышӧ Владимир Аптулаевын кум икшывыжат марий лӱман – Яндияр, Онар, Эрвелина. Поэтессе Татьяна Токтарова йочаж-влаклан Элика ден Элави лӱм-влакым пуэн. Республикысе марий тӱвыра рӱдерым вуйлатыше Наталья Пушкинан ӱдыржӧ Эрвина лӱман. Марий лӱман ӱдырлан эсогыл мурат уло. Шомакшым Мардан Рая возен. «Илавий» мурым уныкажлан пӧлеклен: «Илавий, Илавий, Илавий, тый улат мыланем илыш сий…» Куандара, яллаштат самырык ача-ава икшывыштлан марий лӱмым пуат.
Чолга ача-ава
Теве Параньга район Кугу Пумарий ял гыч Юлия Золотарёва ден Роман Шабдаровын йочашт Эрвина, Эрай, Талви лӱман улыт (снимкыште). Молан лач ма-рий лӱмым ойыреныт? Амалже раш: ача-ава коктынат марий шӱлышан, уста улыт. Роман Валерьевич верысе школышто социальный педагоглан пашам ышта, тыгак географийым да физкультурым туныкта. Юлия Юрьевна кызыт мӧҥгыштӧ шинча. Яра жапыште мушкышым пидеш, атлас тасма гыч пеледышым, ӱпым кылдаш резинкым ышта. Коктынат Марий самырык тукым слётын чолга участникышт улыт. Ешыште мар-ла гына кутырат. Икшывыштын чонышкышт марий шӱлышым изинек шыҥдарат.
«Эрдене шочшо», «патырле вий»
– Икшывылан марий лӱмым кызыт пеш шагал пуат. Шоналташ гын, тудо кузе моторын да виян йоҥга! Эрвина, Эрай, Талви лӱм-влакым «Марий лӱм» тӱшкаште верештынна. Талвилан лӱмым ятыр жап шоненна. Вара йолташнан лӱмжым трукышто шар-налтенна, – ойлат самырык ача-ава.
Эрвина – 6 ияш. Тудо «эрдене шочшо» манын кусаралтеш. Изи ӱдыр аважлан сурт сомылкам ышташ полша: кочкаш шолташ, когыльым тӱрлаш, пӧрткӧргыштӧ арулыкым эскераш. Йочасадыште кушташ тунемеш, марий мурым колышташ кумылан. «Ямде лий» газетым шергалаш йӧрата. Сайын лудын огеш мошто гынат, сӱретым онча, кандашымше лаштыкыште тӱрлӧ уштодышлан вашмутым кычалеш.
Ныл ияш Эрай – ачажын полышкалышыже. Лӱмжӧ тыгак «эрдене шочшо» манме лиеш. Чӧгытым кидышкыже налешат, пудам перкала. Ачажын шуруповёрт дене пашам ыштымыжым ончаш йӧрата. Йочасадыште эртаралтше кажне гаяк мероприятий ден конкурсышто мастарлыкшым терга. Акаж семынак марий мурылан шӱман.
Талви вашке кок ийым тема. Лӱмжӧ «патырле вий» манын кусаралтеш. Изаж ден акажым ончен кушкеш. Нунын гаяк марий шӱлышан лиеш, очыни.
Ончыкылык верч тыршат
– Ме марий пайрем-влакым пайремлена, марий йӱлам шукташ тыршена. Тидлан мемнам ача-авана, коча-кована-шамыч туныктеныт. Марий шӱлышым ынде икшывына-влакын чонышкышт шыҥдарышаш улына. Нуно тӱвырам палышт, йӱлам жаплышт ма-нын тыршена. Еш – тиде чыла, йоча – куан да ончыкылык, – ойлат Юлия Юрьевна ден Роман Валерьевич.
Чумбылат курыкыш еш дене ий еда коштыт. Теҥыз воктекат миеныт. Тений кеҥежым Татарстан Республикысе Камское Устье посёлкышто каненыт. Шочмо кундемысе вершӧрышкӧ чӱчкыдын лектыт. Икшыве-влак пӱртӱсын моторлыкшым изинек ужын кушкышт манын тыршат.
