Тюмень областьысе марий-влакын национально-культурный автономийыштым вуйлатыше М.А.Меньших «Кече» ансамбльым 2019 ийыште чумырен. Эн ончыч уныкаже-влаклан, Данил ден Настялан, «Йӱржӧ йӱреш» мурым туныктен. Нуным ужын, Настян йолташ ӱдыржат марла мураш кумылаҥын. Икмыняр жап гыч эше ныл икшыве ушнен. Чонышкышт марий муро эрелан шыҥен. Посна пӧлем укелан кӧра Маргарита Анатольевна нуным мӧҥгыштыжӧ иквереш чумыра, усталыкыштым вияҥда.
– Кече уло тӱням волгалтара, шокшо «кидше» дене капым веле огыл, чоным ырыкта. Икшыве-влакат тыгаяк улыт. Садлан ансамбльым тыге лӱмденна, – ойла вуйлатыше. – Тюменьыште марий-влак ятыр улыт. Марла кутырышо йоча укеат. Марий йылме йомеш манын чонем коршта. Икшыве-шамыч марий тӱвыра, йӱла, модыш нерген палышт манын, ансамбльым чумыренам.
Марий ача-аван рушла кутырышо йочаштым марла мураш туныкташ куштылгыжак огыл гынат, ансамбльын репертуарже кажне ийын пойдаралтеш. Тӱрлӧ конкурсышто усталыкыштым ончыктат. Тюменьыште эртаралтше «Радуга», «Мост дружбы» фестивальлашке эре ушнат.
М.Меньшихын ончыкылык паша радамже кӱжгӧ. Ансамбльлан посна пӧлемым ойырен, йоча-влак дене пырля марий куштымашым шындаш, нуным икмыняр семӱзгарым шокташ туныкташ шона.
