Кострома олаште школ хор-влак коклаште «Поют дети России» VIII всероссийский фестиваль эртаралтын. Тушко Йошкар-Оласе Бауман лицей пеленысе «Лира» йоча сымыктыш школын «Узоры» калык муро хоржо (снимкыште) ушнен да «Народные школьные хоры средних и старших классов» таҥасыште кумшо верым сеҥен налын.
Конкурсыш ушнышо 14 коллектив кече еда усталыкшым ончыктен, мастер-класслаште улан тунемын. Кажнылан тӱрлӧ вере концертым ончыкташ пиал шыргыжалын: сарзе академийыште, ветеран-влаклан госпитальыште, геронтологический рӱдерыште да оласе туныктымо тӧнежлаште. Марий ӱдыр рвезе-влак «Майский» усталык пӧртыштӧ выступатленыт. «Узоры» хор марла, рушла мурылам калык ончыко луктын. Репертуарышт гыч «Олыкшат кумда» мурым фестивальын гала-концертыштыже 400 наре йоча пырля йоҥгалтарен.
Тунемше ден кугыеҥ-влакын кыртмен, ваш умылен пашам ыштымышт ты коллективлан сеҥымашке шуаш полшен.
– Кеҥеж каныш годымак конкурслан ямдылалташ тӱҥалынна. Репетицийым кажне кечын эртаренна. Йошкар-Ола гыч Кострома марте кужу корно икшыве-шамычым лӱдыктен огыл. Миен шумеке, верысе ик лагерьыш вераҥденыт. Икшыве-влакым тамлын пукшеныт, дискотекым эртареныт, кином ончыктеныт. Чылалан моткоч келшен. Конкурс кокымшо кечынже лийын. Хорын участникше-шамыч кум мурым йоҥгалтареныт. Уста лыкыштым жюри кӱкшын аклен. Гала-концертлан тӱрлӧ калык гыч лекше йоча-влак шке калык тувырыштым чиеныт. Могай сылнын койын! А сценыште нылшӱдӧ йочан пырля мурымыжо кажне ончышын кумылжым савырен, – ойла «Лира» йоча сымыктыш школышто вокалым туныктышо С.Ю.Орлова.
Оля МАЙКОВА.
Фотом «Лира» йоча сымыктыш школын архивше гыч налме
