Башкортостан Республик Калтаса, Мишкан, Пӱрӧ районла гыч куд тунемше ден кум туныктышо Йошкар-Олашке марий йылме да литератур дене регион-влак кокласе олимпиадышке микроавтобус дене миенна. Тушто мемнам шокшын вашлийыныт, тӱшкагудышко илаш пуртеныт. Сылне ола мучко экскурсийым эртареныт. Шуко сувенирым налынна, мотор фотом ыштенна. М.Шкетан лӱмеш Марий национальный драме театрыште «Ваня чӱчӱ» спектакльым онченна. Философий шӱлышан ыле гынат, мыланем келшен.
Олимпиаде МарГУ-што эртаралтын. Мый марий йылме дене шинчымашем тергенам. Сеҥыше-влак радамыш лектынам. Моткоч чот йывыртенам! У йолташ-влакым вашлийынам. Кызытат кылым кучена. Кок кече вашке эртен каен. Ушышто ик шонымашым кучем: Йошкар-Олам кеҥежым ужаш гын, эшеат ямле ыле.
Аделина ЯПАРОВА.
Башкортостан, Пӱрӧ, Кужнур.
