Апрель мероприятийлан поян лийын. Нунын коклаште – «Ший талешке» шымлыме паша конференций, строевой смотр, «Георгиевский тасма» акций, «Ший талешке» уш-акыл марафон да «Марий патыр» республикысе конкурс.
«Марий патыр» конкурс-таҥасымаш поснак поро шарнымашым коден. Тудым Республикысе марий тӱвыра рӱдер эртарен. Уверым ужмек, мыят вием тергаш кумылаҥынам. Конкурсыш Марий Элысе икмыняр район ден пошкудо Татарстан Республик гыч шым чолга рвезе ушнен. Кажныжлан кум конкурсышто мастарлыкшым ончыкташ, уш-акылжым тергаш кӱлын. «Мый марий рвезе улам» йыжыҥыште шке нерген каласкаленна, видеопрезентацийым ончыктенна. «Вий, проворлык да арвий» йыжыҥ кок ужаш гыч шоген. Ондак лу йодышлан вашмутым кагазеш пуэнна. Жаплан автоматым рончен-погенна. Тиде заданийым пеш куштылгын шуктенам. Тидлан мыйым ачам ден изам туныктеныт. Очыни, ик эн оҥай заданий – еш, тукым да калык йӱлам ончыктымаш. Тидлан ончылгоч ямдылалташ кӱлын. Конкурсант-влаклан лишыл еҥышт, йолташышт але ансамбльын участникышт полшеныт. Молым ончен, шкеат шуко ум пален налынам. Ме «Кепшылым руымаш» йӱлам почын пуэнна. Пеленна ик ияш Колюшым лӱмынак намиенна.
«Марий патыр» конкурс мыланем пеш келшен. Кажне рвезе марий шӱлышан, мураш-кушташ кумылан, марий йӱлам пагалыше да жаплыше. Мый «Чумбылатын ВийАрже» таҥасыште ойыртемалтынам. Тыгай таҥасымашке вес ганат ушнаш кумылем уло.
Родион НЕБОГАТИКОВ.
У Торъял, Токтарсола.
