У тунемме ий куан увер дене тӱҥале. Марий-влакын тӱшкан илыме кундемласе марий школлаште йоча-шамыч марий йылме да марий литератур предметлам у учебник дене тунемыт. Башкортостан да Удмурт республик-влакын образований да науко министерствышт марий книга-влаклан кугу заказым ыштеныт. Марий Эл Республикысе Марий туныктыш институтын па-шаеҥже-влак, у ту-немме ийлан йоча-шамыч деке марий книга-влак миен шуышт манын, кеҥеж мучко чот тыршеныт. Башкортостан Республикыш эн шуко книгам колтеныт: 5913 экземпляр. Тиде 2-шо класслан «Марий йылме» ден «Луд-шаш книга», 3-шо класслан «Лудшаш книга», 5-ше гыч 9-ше класс марте «Марий йылме», тыгак 5-ше ден 6-шо класслан «Марий литератур» дене тунемме пособий-влак. Кажне книгам 700 утла экземпляр дене налыныт.
– Марий туныктыш институт Марий Эл Респуб-ликысе образований да науко министерствын заказше почеш тунемме книга-влакым ынде визымше ий ямдыла. Ты пагытыште Марий кундемысе школ-влаклан марий йылме, ли-тератур, ИКН предметла дене олыкмарла да курыкмарла 26 тӱрлӧ учебникым савыктыме, – ойла Марий туныктыш институтын редакционно-издательский пӧлкажым вуйлатыше Н.В.Гусева. – Марий-влакын тӱшкан илыме регион-шамычымат ӧрдыжеш кодымо огыл. Башкортостан ден Удмурт кундемла дене кылна пеҥгыде. Нуно ий еда, заказым ыштен, книгам налыт. Тунемме книга-влак тений кажне марий школыш, кажне марий йоча деке миен шуыныт манын шонена. Теве Татарстан Республикысе чумыр марий школ-влаклан кызытеш заказ лийын огыл. Посна школ гына йодмаш дене лектын.
Каласыман: учебник-влакым федерал кугыжаныш образовательный стандарт, тыгак уэмдыме ФГОС почеш ямдыленыт. Тӱҥалтыш класслаште тунемше-влаклан книга-шамыч сылне сӱретан, тӱрлӧ чиян, оҥай материаллан поян улыт.
Тунемме книга-влаклан заказым школ-шамыч посна огыл, а пырля чумырген, республикысе Образований да науко министерстве гоч колтыман. Тыге учебникын акше шулдырак лиеш.
И.СТЕПАНОВА.
