Турша школышто тунемше нине ӱдыр-влак: Настя Жаркова (3-шо класс), Злата Охотникова (1-ше класс) да Катя Иванова (3-шо класс) – шочмо марий йылме дене каласыме ик шомак сеҥымашыш шуаш полша манын шоненыт мо? Уке, очыни. Но марий мутын виян, келге шонымашан да лишыл улмыжым «Живое слово родного края» республикысе усталык конкурсышто сеҥышыш лекмекышт умыленыт. Ӱдыр-влаклан, ик шомакым образыш савырен, шочмо кундемын сӧраллыкшым, поянлыкшым, ойыртемалтше тӱсшым, историйжым, йӱлажым почын пуаш кӱлын. Нунылан туныктышышт да класс вуйлатышышт Ольга Николаевна Тарасова, ача-авашт ден ковашт полшеныт. Настя подкогыльо нерген каласкален. Катялан сеҥымашке шуаш команмелна «полшен». Злата шордо нерген ойлымашым возен да янлыкым пластилин гын ненчен.
Марий Эл Республикысе образований да науко министр Н.В.Адамова ӱдыр-влакым Марий тиште пайремыште саламлен. Российын сулло сӱретчыже Иван Ямбердов, Марий Эл Республикысе культурын сулло пашаеҥже Римма Сапаева дене вашлийын мутланымаш да пел курым утла ончыч савыкталтше «Ямде лий» газетым шергалмаш (снимкыште) шымлыме пашалан у шонымашым шочыктеныт. Историеш кодшо пырля войзалтме снимке тек у сомылын икымше ошкылжо лиеш.
