Марий Элын рӱдолаштыже калыклан эше ик сай каныме вер ешаралтеш. «Жильё и городская среда» нацпроект почеш Сомбатхей кундемыште «Марий паркым» шотыш кондат. Ты пашалан 2022 ийыште пижыныт, тений 1 март гыч тӱзаташ тӱҥалыныт. Пашам 31 июльышто мучашлышаш улыт.
Паркыш пурымаште йошкар тӱсан тӱҥ капка ден буква-влак торашке волгалтыт. Нуным ужынак, чылажымат ончал савырныме шуэш. Арам огыл каныме верым «Марий парк» манын лӱмденыт. Тудын тӱҥ ойыртемже – марий сынан улмыжо. Каналташ шинчаш теҥгыл, лӱҥгалтыш, шӱкшакым кышкаш келыштарыме урно ден стенд-влакым марий тӱр дене сӧрастарыме. Тушто кугу да изи корно-влак, уремысе кинотеатр, калыкле кухньо кафе, йоча вер, тӱвыра мероприятийым эртараш сцене да моло лийыт. Марий парк тек шуко калыкым иквереш уша.
Н.Лаврентьеван фотожо-влак.
