Кугезе марий тӱрым шымлыше, марий тӱрызӧ Ираида Степанова «Орнаментальное искусство марийской вышивки» черетан книгам савыктен луктын. Тудым Россий Президентын грантше полшымо дене ямдылыме. 5 мартыште В.М.Васильев лӱмеш МарНИИЯЛИ-ште книган презентацийже эртаралтын.
– 2019 ийыште Марий тӱр рӱдерын еҥже-влак дене пырля Морко, Оршанке, Шернур районласе тоштерлаште лийынна. Чылаштыжат ойыртемалтше тӱр-влакым верештынна. Нуным арален кодаш манын, фотом ыштенна. Вара корнына Угарман, Пермь кундемлашке шуйнен. Тюмень олаште ик тукымвожын коллекцийжым онченна, – палдара Ираида Александровна.
Моткоч шуко поянлыкым иквереш погымеке, сӱретче, дизайнер, этнограф, тӱрызӧ, шымлызе-влаклан пашаштышт кучылташ келшыше книгам ямдыленыт. 280 лаштыкан у книгаш 1120 фотом вераҥдыме. Кажне экспедицийлан посна ужашым пӧлеклыме. «Марий тӱр марий калыкын койыш-шоктышыжым, илыш ойыртемжым, шӱм-чон поянлыкшым раш почын пуа, но тудым шке верешыже вераҥдыман, – ойла И.А.Степанова. – Мутлан, оҥеш тӱрлышаш тамгам урвалтеш тӱрлаш ок лий да молат. Марий тӱрын эмлыше вийже уло. Тидым умылашлан тамгам шымлыман да лудын моштыман».
Снимкыште: Марий Эл Республикысе культур, печать да калык-влакын пашашт шотышто министерствын пашаеҥже О.А.Веденькина И.Степановам саламла.
