Шуко еҥын шонымыж почеш, массаж – ала-могай черым эмлымаш. Педиатр деке мийымеке, ача-ава-влак тиде мутым колытат, икшывыштын тазалыкше шотышто тургыжланаш тӱҥалыт. Тӱрлӧ йодышлан вашмутым муаш манын, Морко рӱдӧ эмлымверыште 26 ий массажисткылан пашам ыштыше, кызыт шке кабинетыштыже тыршыше Е.И.МИХАЙЛОВА (снимкыште) дене кутырышна.
– Евдокия Ивановна, таза йочалан массажым ыштыман мо?
– Массаж – тазалыкым пеҥгыдемдыше ик эн сай процедур. Тудым ыштыме годым коваштын, луын, чогашылын, кӧргӧ орган-влакын пашашт саемеш. Уш виянрак пашам ышташ, вӱр сайынрак кошташ тӱҥалеш, опорно-двигательный аппарат вияҥеш. Йочан кумылжо кӱза, сайын малаш тӱҥалеш. Тудо пеҥгыде капкылан кушкеш.
– Мыняр тылзаш йочалан массажым ышташ тӱҥалман?
– Кок тылзым темыме марте ава азан тупшым, мӱшкыржым ниялткала, эркын кидшым, йолжым туржеш. Массажым йочан кок-кум тылзаш улмыж годым ышташ тӱҥалаш лиеш. Икымше курс 10 кече наре шуйна. Кокымшо курсым икшывын шинчаш тунеммыж годым эртыман. 10-11 тылзаш йочалан кошташ тӱҥалмыж деч ончыч массаж пайдале.
– Чыла йочалан массажым ышташ лиеш мо?
– Онкологий дене черле, начар шӱман, начар вӱргӧрнан шӱяҥше коваште черан йоча-влаклан массажым ышташ огеш лий. Тыгак кугемше мокшан икшывылан шекланен ыштыман.
– Могай чер улмо годым массажым ыштыманак?
– Тӱҥ шотышто калып йол (плоскостопий), кадыр вӱдлу (перекос тазовых костей), сколиоз, дисплазий черан йоча-влаклан массажым ышташ кӱлеш. Пневмоний, бронхит годым рун огеш ойырло гын, массаж полша. Тыгак неврологий черан икшывылан курсым эртыман.
– Школышто тунемше ӱдыр-рвезе-влаклан массаж мо дене пайдале?
– Ятыр йоча парт коклаште шӧрын але лап шинча. Тудын осанкыжым тӧрлаташ, уто напряженийым, нойымашым кораҥдаш массаж полша. Школыш коштшо ӱдыр-рвезе-влаклан ийлан кок гана 10-15 сеансым эрташ пайдале. Шанчызе-влакын ойышт почеш, йочалан чӱчкыдын массажым ыштет гын, тудо уверым куштылгын шарнен кодеш, тунеммаште шагал йоҥылышым ышта да урокышто тӱткынрак колыштеш.
– Медицине шинчымаш деч посна ача-ава-влак икшывылан массажым шке ыштен кертыт мо?
– Массажым специалист ыштышаш. Ача-ава-влак массажистын умылтарымыж почеш гимнастикым ыштен кертыт.
