Миклай Казаковын кышаж дене

Поэтессе, Россий писатель ушемын еҥже, Марий Эл Республикын сулло туныктышыжо, Шернур район Кожласола ялын ӱдыржӧ З.В.ЕРМАКОВА (снимкыште) 28 сентябрьыште 75 ийым тема. Лӱмгечыже вашеш тудын дене мутланышна.

– Зинаида Васильевна, сылнымутлан кунам шӱмаҥында?

– 8-ше классыште тунеммем годым Шернур район Марисола школышко серызе-влак кугу делегаций дене толыныт ыле. Нунын коклаште Миклай Казаков лийын. Мый поэтын сцене гыч почеламутшым лудмыжым тӱткын колыштынам, мотор костюмжым, марий тувыржым куанен онченам. Мӧҥгӧ толмеке, пӧртна воктене шогышо писте, кок куэ нерген йӱдвошт возенам. 9-10-шо класслаште марий йылмым да литературым писатель Анатолий Павлович Березин туныктен. Тудо сылнымут кружокым почын. Мый тушко коштынам.

– Умбакыже мастарлыкдам кушто таптенда?

– Надежда Константиновна Крупская лӱмеш Марий пединститутыш тунемаш пурымеке, литератур кружокыш ушненам. Тудым Тамара Гавриловна Апатеева вуйлатен. «Сылнымут шыже» семинарышке коштынна. Мыланем Семён Вишневскийын, Миклай Казаковын почеламутнам лончылымышт моткоч келшен. Тыгак Пермь олаште эртаралтше семинарышке миен коштынам.

– Те йоча-влаклан ятыр почеламутым  возенда. «Чоя Марусь» книгада савыкталтын. Тушко пурышо почеламут-шамыч шке пырысланда пӧлеклалтыныт?

– Пӱтынек шке пырысем-влак нерген возенам. Кызыт кум пырысым ашнем: Мусям, Моисейым, Васёкым.  Нуно чыланат утарен пуртымо улыт. Васёк балкон йымалысе бетон плиташ ончыл йолжо дене кылмен пижын ыле. Копа наре кугытан Моисейым уремыште ужынам: ошкылын да йӧралт каен, тарванен да йӧралт каен. Ӱмаште Мусям пуртенам. Тудын капешыже коршаҥге пижын пытен ыле. Почеламутем-влак ончычсо пырысем-шамычлан пӧлеклалтыныт. Нуно чын лийше сӱрет негызеш возалтыныт.

– Те Марисола школышто марий йылмым да литературым ятыр ий туныктенда. Тунемшыда-влак кызыт сылнымут тӱняште кумдан палыме улыт. Йоча-шамычым сылнымутлан кумылаҥдаш могай йӧн-влакым кучылтында?

– Марисола школышко туныкташ толмекем, «Ший оҥгыр» сылнымут кружокым почынам. Тыгаяк лӱман газетым лукташ тӱҥалынна. Йоча-влакын возымо пашаштым тушко пуртенна. Школышто тиде йӱлам кызытат шуят. 1989 ий гыч кажне арнян «Факел» газетым рушла-марла луктынна. Марий йылме да литератур уроклаште сочиненийым возыктенам да газетлашке колтенам.

– Марий юнкор ден марий йылмым туныктышо-влаклан мом тыланеда?

– Йоча-влакын возаш кумылышт ынже воло. Туныктышо-шамыч сылнымут кружокым вӱдышт, ӱдыр-рвезе-влакым сылнымутышко «шупшышт» да сераш кумылаҥдышт.

– Зинаида Васильевна, шушаш лӱмгечыда дене шокшын саламлена. Пеҥгыде тазалыкым, кужу ӱмырым, усталык пашаштыда лектышым да сеҥымашым тыланена.