«Великая Отечественная война» ӱстембал модыш – Республикысе самырык-влакын полатышт пеленысе Патриот шӱлышеш куштышо да спорт рӱдер Йошкар-Оласе 16-шо номеран школ ден Т.И.Александрова лӱмеш 11-ше номеран лицейлан мероприятийлаште чолгалыкым ончыктымыштлан «Великая Отечественная война» ӱстембал модышым пӧлекленыт. Тидын нерген самырык-влак дене пашам ыштыше И.И.ИВАНОВА каласкала:
– Модыш урок деч ӧрдыжысє пашам эртараш келшен толеш. Тудо кок блок гыч шога: 1941 ий («Брест оласе карманым аралымаш», «Подольский курсант-влакын подвигышт», «Моско воктенысе контрнаступлений») да 1942 ий («Севастополь верч кредалмаш», «Сталинград кредалмаш», «Ленинград оласе блокаде»). Модышыш 240 оҥай йодыш, модмо «пасу», салтакын фигурыжо, офицер планшет, жетон, карточко-влак да молат пурат. 12 ияш деч кугурак ийготан 2-5 еҥ модын кертеш. Модашлан мобильный приложенийым келыштарыме. Ролик, статья, справочник, модыш, технике ден саргурал-влакын модельышт, Кугу Ачамланде сарын геройжо-шамыч кодшо курымысо илышыш пӧртылаш полшат. Модыш гоч йоча-влаклан историйым тунемаш оҥайрак лиеш.
Х.АЛЕКСАНДРОВА.
Снимкыште: Т.И.Александрова лӱмеш 11-ше номеран лицейын юнармий отрядшым (вуйлатыше – Н.А.Дудар) рӱдерын специалистше Е.Ю.Германова саламла.