Мый у ий кожым сӧрастараш пеш йӧратем. Модыш-влакым кевытыште наледена. Но чонлан келшышым шке гыч садак ыштем. Тений йылгыжше кагаз гыч лум пырче-шамычым пӱчкеденам. Авамын йоча пагытысе модыш-влак аралалт кодыныт, нунымат огына мондо. Пайрем пушеҥгым чодыра гыч огына кондо, чаманена. Ик тылзе жаплан шогалташ да кошкымекше луктын кудалташ? Уке, тек шке верыштыже тӱзланен кушкеш. Авам, акам дене, Элнет эҥер сер дене коштшыла мотор кожым ойырен, кумшо ий сӧрастарена. Пӱртӱс лоҥгаштат У ийым пайремлаш оҥай. Чыладам шушаш У ий дене саламлем!
Марина СТЕПАНОВА.
Волжский, Упшер.
