Робототехник ончыкылык профессийлан шотлалтеш. Йоча-влакым ты корным ойырен налаш изинек ямдылат. Йошкар-Олаште «Технологии будущего» рӱдер пашам ышта. Тудым А.В.КАЧАЛОВ вуйлата.
– Мемнан рӱдерыш йоча-влак ныл ияш гыч кошташ тӱҥалыт. Нуно лего гыч тӱрлӧ модышым погат, – ойла Артём Владимирович. – Погымо модышым компьютер да программе полшымо дене «ылыжтат»: тарванылаш, тӱрлӧ йӱкым лукташ туныктат.
Робототехнике да программирований дене урокым кажне ийын келгемдат. Робот-шамычым кугуракым да нелырак моделяным келыштарат. Кугурак ийготан йоча-влак ушан пєртын, копшаҥге-роботын, мамонтын да шуко молын макетыштым погат. Тыге шке гыч проектым ышташ тунемын шуыт. Команде дене пашам ыштат. Модельым, шке гыч шонен, илышыш шыҥдарат. Тыгыде ужашлам погымо дене парня лывыргылыкым вияҥдат. Илен-толын, йоча-влакын ямдылыме роботышт айдемын полышкалышыже лийыт манын ӱшаныме шуэш.
Рӱдерыш коштшо йоча-влак Всероссийский таҥасымашлаште шуко гана мастарлыкыштым ончыктеныт. Нунын пашаштым кӱкшын акленыт.
