«Марий Чодыра» национальный парк – республикнан пӱртӱс поянлыкше. Яндар ер, пич чодыра да шотлен пытарыдыме памаш-влак шер пырче гай улыт. Нуным ик аршашыш чумырышо ший шӱртӧ– Элнет эҥер. Но шукерте огыл парк гыч тургыжландарыше увер толын: Керебеляк лесничестве кумдыкышто эҥерым ий леведын (снимкыште). Ты пӱртӱс кончыш мо нерген ойла?
– 25 ий наре пашам ыштыме жапыште Элнетын ий дене комыжлалтмыжым икымше гана ужынам. Игече левештмекат, ий шулен огыл, тидат ӧрыктара. Пытартыш кум ий жапыште эҥерын вашталтмыже вигак коеш. Вӱдшор годым Элнет ончычсо семын огеш шарле, келгытшат иземын, вӱдшат шагалемын, – ойла «Марий Чодыра» паркын кугыжаныш инспекторжо Вячеслав Алексеевич Кидалашев.
Вӱд шагалемме да ий дене леведалтме коклаште кыл уло мо? Вашмутым Элнет пундашыште кычалман.
– Шукын тыге шонат: эҥерым ий деч тудын писылыкше арала. Тӱрыснек тыге огыл. Ондак Элнетыш моткоч шуко памаш йоген пурен. Вӱд эре ешаралтын, варналтын. Пытартыш жапыште памашын чотшо шагалемын, южо вере йӧршеш петырнен. Эҥерыш вӱд йоген пурымым чарнен. Тыге Элнет ий дене комыжлалтын, – умылтарат «Марий Чодыра» паркын пашаеҥже-влак.
Тыгай вашталтыш эҥерын сынжым веле огыл, тыгак тудын йыр тӱзланыше пӱртӱс сӱретым весемда. Ты кундемын ончыкылыкшым умылаш манын, келге шымлыме пашам эртарыман.
Национальный паркын пресс-службыжын уверже негызеш
Катя СЕРГЕЕВА ямдылен.
Фотом паркын архивше гыч налме.
