Шочмо элнам, Российым, осал тушман деч аралаш жап толмеке, 21 ияш, кугу капан самырык рвезе, моткоч лишыл родо-тукым изам Кирилл Сухов (снимкыште) сарзе-шамыч радамыш шке кумылын шогалын. Ме тудын дене Эпиш Пагулын кугезе уныкаже улына. Кирилл мыйын тунемме школыштак, Арбаныште, шинчымашым поген.
Но… мемнан деке кугу туткар лийме нерген ойган увер тольо: младший сержант Кирилл Сухов тушман-влак дене вашпижмаш годым вуйым пыштен…
Могайрак лийын Кирилл изам? Теве 39079-ше номеран войско¬вой частьын командирже Кирилл Дамирович Суховлан 2024 ий 9 декабрьыште тыгай характеристикым возен: «Младший сержант Сухов отделений командир семын самырык салтак-влакым тӱрлӧ саманыште шкем чын кучаш моштен туныктен. Спортсмен семынат моткоч виян, йолташыже-шамычлан полшаш эре ямде лийын: нуным тул йымач утарымаште ятыр гана лӱддымылыкым ончыктен. Мужество орден дене палемдалтын, Таумутым шуко гана налын. К.Д.Сухов Российын ӱшанле эргыже улмым ончыктен».
Мый патыр, лӱддымӧ родо-тукым изам дене кугешнем! Арбан школат шке тунемшыжым огеш мондо нигунам!
Драгояр ЯНАЙ.
Медведево, Арбан.
Фотом еш архив гыч налме
