Кумда степьысе калыкын илышыштыже имне ойыртемалтше верым налеш. Илышйӱлаштым але фольклорыштым ончалаш гын, туштат чӱчкыдынак вашлиялтеш. Имне айдемын вийжым да пиалжым ончыкта. Тудлан кочкышым кычалын, ожно бурят-влак ик вер гыч весыш кусныл иленыт. Кызытсе жапыште тыгай койыш шагал вашлиялтеш.
Сарюна Галсанован (снимкыште) ешыштыже вич имне уло: кок вӱльӧ да кум ожо. Бурятий Республикысе Кяхтинский район Бурдуны улусышто (ялыште) вич имне деч шагалрак ончышо укеат. Ты вольык арулыкым йӧрата, сандене ӱдыр-рвезе-влакым изинекак имньым яндарыште ашнаш туныктат. Улусышто имньым огыт кӱтӧ: эрдене да кастене шӱльым пуат, вӱдым йӱктат, шерыт да пасушко луктын колтат. Вольык эрыкыште коштеш.
– Вич ийым темымеке, йоча-влакым имньым кушкыж кудалышташ туныктат, – ойла Сарюна. – Мый кандаш ияш гыч имне ӱмбалне улам. Ӧртньӧр деч поснат шкемым пеҥгыдын кучем.
Пел илышым имне ӱмбалне эртарыше калык эн тале имнешкым ойыраш тӱрлӧ таҥасымашым эртара. Бурятийыште спортын калыкле куд видше уло, тушко имне дене кудалыштмашат пура. Эн кугу таҥасымаш Сурхарбан калыкле спорт пайремыште эртаралтеш. Июль тӱҥалтыште эн тале имнешкым, пикш гыч лӱйкалышым да бурят кучедалмаште эн виян патырым ойырат.
Катя СЕРГЕЕВА.
Фотом еш архив гыч налме.
