Звенигово район 2-шо номеран Красногорский школын тунемшыже Марта Сергеева «Пятница» телеканалысе «Вундеркинды» передачыште карате дене мастарлыкшым ончыктен. Тӱрлӧ вер гыч погынышо лу вундеркинд дене мурызо, вӱдышӧ, актриссе Юлия Ковальчук ден тӱнямбал кӱкшытан куштызо Евгений Папунаишвили таҥасеныт. Вундеркинд-влак сеҥышыш лектыныт.
– Марта каратеш вич ияш гыч коштеш. Шем поясше уло. «Вундеркинды» передачым ончымеке, ӱдыремым тушко колташ кумыл лектын. Кастингым эртымеке, икмыняр жап гыч мемнан деке йыҥгыртеныт да Москошко ӱжыныт. Съёмко Мосфильмыште эртаралтын, 31 майыште передаче лектын. Чапланыше еҥ, уста йоча-влак дене палыме лияш Марталан моткоч келшен. Сеҥен налме пӧлекше (телефон) ты передачым шарныкташ тӱҥалеш, – ойла ӱдырын аваже Т.А.Сергеева.
