Кеҥеж – сылне пагыт. Йоча-влак тазалыкыштым пеҥгыдемдат, модыт, юарлат, тӱрлӧ семын жапыштым эртарат. А уремыште могай гына транспорт уке?! Велосипед, самокат, питбайк, электросамокат, мопед да молат. Ӱдыр-рвезе-влакын мототранспорт дене кудалыштмыштымат ужаш лиеш. Ты шотышто корнышто могай сӱрет? Ӱдыр-рвезе-шамыч корно правилым эскерат, ача-авашт шекланат мо? Тидын нерген Россий УМВД Кугыжаныш автоинспекцийын Йошкар-Оласе пӧлкажым вуйлатыше Д.Г.Пронюшкин дене мутланышна:
– Икымше пелийыште 16 ияш марте йоча-влакын мототранспорт дене корно туткарыш логалмышт кундемыштына 20 наре процентлан ешаралтын. 16-17 ияш-влак коклаште лу пачаш шукемын. Шукыж годым тыгай азапыш мототехникым виктарыше-влак логалыт. Июльышто мопедист да питбайкер-шамыч дене кылдалтше корно происшествий ятыр лийын.
– Дмитрий Геннадьевич, корнышто йоча-влак дене кылдалтше могай пудыртымаш-шамыч улыт?
– Ӱдыр-рвезе-влак мототранспорт дене талын кудалыштыт, писылыкым огыт эскере. Сайын виктарен огыт мошто, садлан миен керылтыт. Южыштын правашт уке, шлемым огыт упшал. Корно правилым начар палат гынат, кугорныш лектыт. Тыгай транспорт утыжым шерге огыл, садлан ача-ава-шамыч налын пуат. Тидын годым «модыш» гыч лодыш лийын кертме нерген огытат шоналте.
– Могай амаллан кӧра тыгай туткарын чотшо кушкеш? Мототранспорт дене кудалыштше-шамыч шукемыныт?
– Мутат уке, шукемыныт. Автоинспектор-шамыч йоча-влакын кудалыштмыштым, корно правилым палымыштым эре эскерат. Мутлан, идалык тӱҥалтыш гыч мототранспортым виктарыше 200 йочам кученыт. Нунын кокла гыч пелыжым, ийготым шотыш налын, административный муткучыш вучен. Шукыж годым корнышто 13-17 ияш-влак логалыт.
– «Питбайк мопед огыл, садлан права деч посна кудалышташ лиеш», – маныт самырык-влак да ача-авашт. Чын мо?
– Мопед – кок але кум ораван, бензин двигателян транспорт. Тудын писылыкше шагатыште 50 километрыш шуэш. Мопедлан скутер, квадроцикл келшен толыт. Питбайк – мотор дене пашам ыштыше, кызытсе жаплан келыштарыме йолорва. Административный законодательстве почеш автомототехнике еҥым, тӱрлӧ нелытым шупшыктышо транспорт маналтеш. Тудын дене тӱшкан пайдаланыме корнышто кудалышташ лиеш, а питбайк дене ок лий. Паспортыштыжо тиде спортинвентарь манын палемдыме. Садлан тудын дене, тыгак вес спортинвентарь-влак, кросс мотоцикл, ПТС деч посна эндуро дене автомашина корнышто кудалышташ чарыме.
– Мопедым, квадроциклым, питбайкым виктарыше йоча-влакым кучат гын, нуным мо вуча?
– Административный муткучыш. Ийготыш шуын огытыл гын, МВД-н ийготыш шудымо-влакын пашашт шотышто подразделенийышкыже учетыш шогалтат. Ача-ава-влакымат статья почеш муткучыш вуча. Садлан мототранспортым йочалан налме деч ончыч шуко гана шоналтыман. Корно правилым чӱчкыдынрак ушештарыман, умылтарыман.
– Дмитрий Геннадьевич, вашмутым пумыланда кугу тау!
– Шкендам, икшывыдам аралыза. Корнышто лӱдыкшыдымылык правилым изижат-кугужат эскерыза.
Жанна ФЕДОРОВА мутланен.
Фотом «ВКонтакте» соцкылысе «УГИБДД МВД по Республике Марий Эл» тӱшка гыч налме.
«Эндуро» термин XX курымын кокымшо пелыштыже шочын. Тиде лакылан корнышто кудалышташ келшыше мотоцикл. Тыгай байк кугу нелылыкым чыта, корнышто улшо чаракым – кӱ, пырня ӱмбач – кудал эрта.
