Таҥасымаш тӱрлӧ лиеш: иктыште капкыл вий аклалтеш гын, весыште – уш-акыл пӱсылык. «Мунло» интеллектуал марафоныш ушнышо-влак кокымшо тӱшкашке пурат.Нуно 13 ноябрьыште С.Г.Чавайн лӱмеш Калыкле книгагудышко погыненыт. Шочмо кундемыштым, йылмыштым,сылнымутыштым да йӱлаштым эн сайын палыше командым ойыреныт. Морко, Звенигово,Советский, Параньга, Кужэҥер районла да Йошкар-Ола гыч 10 команде марафоныш ушнен.
Кум турым иктешлымеке, сеҥыше-влак палдырненыт. Кумшо верыш Кужэҥер район Руш Шой кыдалаш школын «Одар тукым» командыже лектын. Морко район Зеленогорский кыдалаш школын «Эрвий» командыже кокымшо лийын. Эн пӱсӧ уш-акылан ӱдыр-шамыч Параньга район Матародо кыдалаш школышто тунемыт. Нунын «Волгенче» командышт (снимкыште) икымше верым сеҥен налын. Туныктышышт – Нина Алексеевна Семёнова.
Мый тений марафоныш кумшо гана ушненам. Кажне ийын йодыш-влак шонкалаш таратат. Командына дене чот тыршенна. Кӱкшӧ лектышыш шуынна, тидлан ме моткоч куаненна. Тургыжланымаш лийын гынат, ваш умылен, икте-весым колыштын, кажне йодышлан чын вашмутым пуаш тыршенна, – ойла «Волгенче» командын командирже Полина Михайлова.
Кажне команде чапкагаз да шере пӧлек дене палемдалтын. Сеҥыше-влаклан мунло тумнан статуэткыжым кучыктеныт.
