Оршанке посёлкысо сымыктыш школ пеленысе «Забавушка» фольклор ансамбльыш 25 икшыве коштеш. Коллективлан тыгай лӱмым вуйлатыше М.А.Завалина пуэн. И.С.Палантай лӱмеш тӱвыра да сымыктыш колледжыште тунеммем годымак «йоча ансамбльым погаш шоненам», – ойла Марина Анатольевна.
Ӱдыр-рвезе-влак тӱрлӧ ийготан улыт. Сандене репетицийым кок группылан шелалтын эртарат. Кугурак-шамыч иза-ака семын изирак-влаклан полшаш ямде улыт. Кушто кӱлеш – туныктат, каҥашым пуат.
– Ме тӱрлӧ калыкын мурыштым тунемына. Муро гоч калык йӱла-влак дене лишкырак палыме лийына. «Одо марий такмак-влак», «Виче марий муро», «Ой, луй модеш» муро-влак чотрак келшат, – ойлат ӱдыр-рвезе-влак.
