«Ешыште тӱҥжӧ – икте-весым умылымаш, порылык. Ешыште айдеме ласкалыкым, полышым муэш. Лач тушто шочмо верым, йолташым йӧраташ тунемеш да уло чон дене кана. Тушто тыйым эре вучат», – тыге ойлат Людмила ден Константин Сайсановмыт.
Сайсановмыт (снимкыште) Башкортостан Республик Бирск район Памаш селаште илат. Еш оза Йӱдвел кундемыште шофёрлан ышта. Людмила Ивановна – Памаш селасе тӱвыра пӧрт пеленысе «Ший памаш» калык муро ансамбльым вуйлата. Ешыште кум икшыве уло. Кугуракше – Владимир, ешым чумырен. Кызыт Йӱдвел кундемыште ила. Света пелашыже дене вич ияш Элла ӱдырыштым марий шӱлышаным куштат. «Ме марий улына, сандене изинек марий йӱлам пален кушшо манын тыршена. Эллалан марий тувырым лӱмын ургыктымо. Марий вургемым чиен, марий мурым мура», – ойла Владимир. Алёна Уфа олаште ила. Тудо шке жапыштыже «Кӱдыроҥгыр» мурышо ансамбльыш коштын. Алёнан кышажым Полина шӱжарже тошка. Тудо Памаш селасе школын 10-шо классыштыже тунемеш, «Кӱдыроҥгыр» ансамбльын солистше.
Ача-ава икшыве-влакым марий сем дек шӱмаҥденыт. Ешыште марла кутырен, йылмым йӧраташ туныктеныт. Кумытынат марий койышан, шочмо калыкым пагалыше улыт. Сайсановмыт еш жапым пырля эртараш моткоч куана.
Е.ИВАНОВА.
Фото-влакым еш архив гыч налме.
