«Мый отым куштынем пасушто»

Морко район Изи Корамас ялын ӱдыржӧ, поэт, мурызо, «Кугарня» газетын пашаеҥже Алёна Яковлевам шукын палат. Тудын почеламутшо-влак «Марий сандалык», «Ончыко» журналлаште, «Марий Эл», «Кугарня» газетлаште, тӱшка сборниклаште, «Эрвий» альманахыште савыкталтыныт. Икмыняр произведенийжым руш йылмыш кусарыме да «Край соловьиный» альманахыш пуртымо. Тудын мутсаскаже-влакым эстон, финн, венгр йылмылаш кусарыме.
Алёна Яковлева «Ончалтыш» икымше поэтический сборникше дене таҥасымашке ушнен.
– Икымше почеламутет кунам шочын?
– Тӱҥалтышым ачам-авам пыштеныт, йолгорным виктарен колтышыжо туныктышем лийын. Икымше почеламутем авамлан пӧлекленам. Тудым мый 6-7-ше класслаште тунеммем годым сочинений олмеш возенам. Арын школышто марий йылмым да литературым туныктышо Любовь Ивановна Александрова сылнымут шӱлышан, возаш кумылаҥден моштышо ыле.
– Варажым сборниклан ситышым чумыренат.
– Мыйын шонымаште, чылажат йылмым йӧратымаш гыч тӱҥалын. А йылмым палаш да пагалаш ешыште тунемына. «Ончалтыш» книгам С.Эсаулова лӱмеш сылнымут фонд полшымо дене лектын. Тушко шӱдӧ утла почеламут пурен, кум ужаш гыч шога. Еш, ава, икшыве, йоча пагыт, йӧратымаш, илыш нерген шонкалаш таратыше почеламут-влакым чумырымо.
– Тый тыгак йоча-влаклан келшыше почеламутым возет.
– Шке жапыштыже мый йочасадыште пашам ыштенам. Категорийым аралашлан «Роль пальчиков в развитии речи ребёнка» проектым рушла ямдыленам. Йоча-влакын йылмыштым вияҥдымаште парня дене модыктымашын пайдале улмыжо нерген пален налынам. Вара, шкежат ава лиймеке, икшывем-влакым модыкташ тӱҥалынам. Тыге почеламут корныла возалтыныт.

Е.ИВАНОВА мутланен.