– Школышто тунеммем годымак икшыве-влакым семӱзгар дене шокташ, кушташ туныкташ, поро пашам ышташ кумыл лийын. Пелаш деч посна кодмеке, шочшем-шамыч дене каҥашымеке, йоча-влакым ашнаш налаш шонымаш шочын, – ойла Волжский район Памар селасе тӱвыра пєртын методистше Т.А.Яранцева.
Волжский район Нурсола ял гыч Тамара Анатольевнам шочмо кундемыштыже веле огыл, республикыштат шукын палат. Тудо Марий Эл Республикысе тӱвыран сулло пашаеҥже, «Юл сем» калык ансамбльым ятыр ий вуйлата. Шукерте огыл «Йоча кумыл» йоча ансамбльым почын.
Йӧратымаш кажнылан сита
Т.А.Яранцева шке жапыштыже йӧратымашыжым, моштымашыжым шочмо ӱдыржӧ ден эргыжлан пуэн гын, 2010 ий гыч ашнаш налме икшыве-влаклан пӧлекла. 2010 ийыште иза ден шӱжар Георгий ден Дамирам, 2013 ийыште Ники-там, 2014 ийыште Натальям шке ешышкыже конден. Тамара Анатольевна нуным мураш, кушташ, семӱзгар дене шокташ туныктен, шкешотан еш ансамбльым чумырен. 2012 ийыште «Лучшая замещающая семья» республикысе конкурсышто сеҥышыш лектыныт. Кызыт нине ӱдыр-рвезе-влакын – шке илыш корнышт. Туге гынат аваштым огыт мондо, кертмышт семын толыт, полышкалат.
– Нине йоча-влакым йол ӱмбаке шогалтымеке, чонлан йокрокын чучын. Молан эше изирак икшыве-шамычым мӧҥгӧ кондаш огыл манын шоналтенам. Кугу еш ансамбльым чумыраш кумыл эре лийын. Корно угыч йочапӧртышкӧ наҥгаен. Тушто ӱдыр-рвезе-влак ӱмбакет тыгай шинча дене ончат, пуйто «Мыйымат пеленда наҥгайыза» маныт, – ойла поро кумылан ӱдырамаш.
Угыч йоча йӱк
2019 ийыште пӧрт угыч йоча йӱк дене темын. Эн ончыч йыгыр Миша ден Сашам конден. Йыгыр-влак Упшер школын 2-шо классыштыже тунемыт. Урок деч вара ече секцийыш коштыт. Каныш кечын Упшер тӱвыра пӧртыштӧ поделкым ышташ, сӱретлаш тунемыт. Тиде ийынак ик еш гыч Алёша, Валерия да Богдан суртан лийыныт.
Алёша 6-шо классыште шинчымашым пога. Рвезе спортлан шӱман. Ече ӱмбаке икымше гана ӱмаште веле шогалын гынат, школышто шке таҥашыже-влак коклаште – ончылно. Тыгак баскетбол секцийышке коштеш. Балалайке дене шоктен мошта, гармоньымат шупшкеда.
Валерия 4-ше классыште тунемеш. Упшер тӱвыра пӧртысӧ музыкальный школышко коштеш. Скрипке, флейте дене шоктен мошта, хорышто мура. Тудо Тамара Анатольевнан ик эн ӱшанле полышкалышыже. Шольыжо-влаклан урокым ышташ полша, умылтара.
Богдан ӱмаште икымше гана парт коклашке шинчын. Изаже семынак спортлан шӱман: ече дене писын коштеш, талын куржталеш. Акаж дечат вараш огеш код – хорышто мура.
Яра жапыште
™дыр-рвезе-влак чыланат Т.А.Яранцеван вуйлатыме «Йоча кумыл» ансамбльышке коштыт. Тӱрлӧ семӱзар дене шокташ тунемыт, мурат. Тамара Анатольевнан уныкаже-влакат ансамбльын участникше улыт. Икманаш, еш ансамбль ямде.
Чолга ешыште канашат жапым муыт: ече ӱмбаке шогалыт, коньки дене мунчалтат. ™маште, пандемий годым, рюкзакышке кочкышым оптен, чодыраште, Элнет серыште каненыт. Мече почеш куржталыныт, бадминтон дене модыныт.
– Мемнан еш – шуко еҥлан пример. Кажне икшыве мутым колыштшо, келге шинчымашым налже манын тыршем. Йоча-влак тӱрлӧ еш гыч улыт гынат, келшен илат. «Кызыт ме ик еш улына, икте-весынам ойырышаш огынал» манын умылтаренам, – ойла Тамара Анатольевна.
