1981-1986 ийлаште «Ямде лий» йоча газет дене пеҥгыде кылым кученам. Кок гана юнкор слётышто лийынам. 1985 ийыште юнкор слётышто Антонов Ивук лӱмеш премийым пуэныт. Тунам мый Морко районысо Волаксола школ деч вара Йошкар-Оласе медицинский училищыште тунемам ыле. Туге гынат «Ямде лий» эн йӧратыме газетем лийын. «Ямде лийым» училищыш конден, ӱдыр-влаклан ончыктем, лудыктем ыле. Тунам Валентин Исенеков мыйым редакцийыш чӱчкыдын ӱжын. Пеш поро кумылан, йоча чоным умылен моштышо айдеме лийын. Шуко мутланен шинчылтме, тӱрлӧ заданийым пуа ыле, а вара пырля лончылымо, тӧрлымӧ. Валентин Борисович мыланем сылнымут корныш пеҥгыдын шогалаш ӱшаным, ятыр каҥашым, шинчымашым пуэн. «Тый, Таня, пеш молодец улат, – мане икана, – илышыштет кок тӱрлӧ сомылым: чон кӱштымым да кид-йолетлан мо келшымым – ыштет». Медучилищыште тунеммемлан моктен ойла ыле. Мый шке корнем дене ошкылынам. Илен-толын, «Кугарня» газетыште пашам ышташ тӱҥалынам. Таче мартеат поэзий дене кылым кучем. В.Исенековлан ӱмырем мучко тауштен илем.
Т.ИВАНОВА (ПЧЁЛКИНА), Марий Элысе тӱвыран сулло пашаеҥже.
Снимкыште: Валентин Исенеков, Анна Петухова, Алеко Юзыкайн.
