«Калык тӱвыра да шочмо йылме деке йоча-влакым мыскара гоч шӱмаҥдыман», – ойла Мордовий Республик Рузаевский район Левженский посёлкысо школышто изирак класслам туныктышо Артём Викторович Дивеев (снимкыште).
Самырык еҥ школышто тунеммыж годым КВН командын чолга участникше лийын. Куд ий ончыч шочмо школышкыжо туныктышо семын пӧртылын. Эше театр кружокым вуйлаташ тӱҥалын. Артём Викторович, сценыште модмо жапшым шарналтен, кружок пелен КВН модмашым угыч ылыжташ кумылаҥын. Тыге кум ий ончыч «LG-4» командым чумырен.
– Йоча годым ныл рвезе «Левженские джентльмены» командыште модынна. У ушемлан ты лӱмымак коденам. Кызыт тушко тӱрлӧ ийготан 16 йоча коштеш, – палдара самырык туныктышо.
Левженский кыдалаш школышто 80 наре ӱдыр-рвезе шинчымашым пога. Ятырынже руш улыт. А.В.Дивеев кажне икшывым мокша йылме да тӱвыра деке кумылаҥдынеже.
– Ме мыскарам шочмо да руш йылме йӧре ыштена. Сценыш лекме годым чӱчкыдын калык тувырым чиена, мурым мурена, тавалтена. Тыге йоча йылме деке веле огыл, тӱвыра декат мелын лиеш, – ойла Артём Викторович. – Мутлан, кружокым чумыренна веле ыле, тушко йылмым йӧршын палыдыме ик йоча ушнен, весыже умылен, но кутырен моштен огыл. Идалык гыч ты кок тунемше чылт мокша рвезыш савырнен.
Оля МОШКИНА.
Авторын фотожо.
