Анатолий ТИТОВ, «Морко мланде» газетын тӱҥ редакторжо:
– Кажне пагытын – шке саскаже. «Ямде лий» газет ямже дене ынде индешле ий калыкым куандара. Ме, кугурак ийготан еҥ-влак, икте кодде лудынна, шукынжо возкаленна. Тушто почеламутнам, ойлымашнам але увернам ужынна гын, уло чон дене куаненна да возаш утыр кумылаҥынна. «Ямде лийышке» возен, мастарлыкым поген, южо икшывыже журналист корным ойырен налын, ала-кӧжӧ серызе марте кушкын. «Ямде лий» дене мый кодшо курымын шымлымше ийлаштыже таҥлалтынам да тачысе кече мартеат тудым эскерем. Йоча газетын кумылаҥден моштымыжлан кӧра мыят журналист лийынам. «Ямде лий» газетлан, коллегем-влаклан шуко возышым да лудшым тыланем.
