1-4 июньышто Российысе школьник-влакын толкынышт Москошто Всероссийский спорт фестивальым эртарен. Тушко элнан тўрлӧ регионжо гыч 475 тунемше ушнен. Марий Элын чапшым Советский район Кужмарий школын 6-шо классшым тунем пытарыше Настя ОРЕХОВА арален. Тудо 5-6-шо класслаште тунемше ўдыр-влак коклаште «Сила РДШ» таҥасыште турникыште тўрлӧ упражненийым ыштыме дене 2-шо верыш лектын. Настям физкультурым туныктышо В.В.Петров ден ачаже ямдыленыт.
– Илышемым спорт дене кылдаш шонем. Кочам школышто 40 ий утла физкультурым туныктен. Мый тудын гай лийнем, – ойла Настя.
